གདན་ས་ཁམས་པ་སྒར་འབྲུག་མཐོ་སློབ་དྷརྨ་ཀཱ་ར།
བོད་ཟླ་དྲུག་པའི་ཚེས་བཞི་ནི་བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་མཆོག་གིས། ཡུལ་ཝ་ར་ན་སིའི་དྲང་སྲོང་ལྷུང་བ་རི་དྭགས་ཀྱི་ནགས་སུ་འཁོར་ལྔ་སྡེ་བཟང་པོ་ལ་བཀའ་དང་པོ་བདེན་བཞི་ཆོས་འཁོར་བསྐོར་བའི་དུས་ཆེན་ཁྱད་པར་ཅན་ཡིན་གཤིས། འདི་ག་འཕགས་ཡུལ་ཁམས་སྒར་འབྲུག་མཐོ་སློབ་དྷརྨ་ཀཱ་རའི་མཁན་སློབ་རྣམ་པས་གནས་བརྟན་ཕྱག་མཆོད་ཀྱི་ཆོ་ག་གསུངས་ཤིང་། དུས་བཟང་དང་འབྲེལ་འཛིན་གྲྭ་བདུན་པ་ཕར་ཕྱིན་ལོ་རིམ་གསུམ་པའི་སློབ་གཉེར་བའི་ཁོངས་ནས། ཀུན་མཁྱེན་ཆེན་པོ་མི་ཕམ་པདྨ་དཀར་པོ་མཆོག་གིས་མཛད་པའི་གཞུང་མཆོག་“ཆོས་འཁོར་དོགས་གཅོད་རྩ་འགྲེལ་”གྱི་ཐོག་ནས་ལུང་རིགས་ཀྱིས་བརྒལ་བརྟག་མཛད་པ་དང་། སྟོན་པའི་རྣམ་ཐར་དང་འབྲེལ་བའི་ཆོས་བཤད། སྟོན་པའི་སྐུ་གསུང་ཐུགས་ཀྱི་ཆེ་བ་བརྗོད་པའི་སྙན་རྩོམ་ཁག་ལྗགས་ཀློག་གནང་བ་སོགས་ཀྱིས། འདི་ལོའི་ཆོས་འཁོར་དུས་ཆེན་ཡུལ་དུས་གནས་བབ་དང་བསྟུན་ནས་སྟབས་བདེའི་ངང་སྲུང་བརྩི་ཞུས་པ་ལགས་སོ།།
