ལོ་འཁོར་གྱི་ཡིག་རྒྱུགས་བཏང་བ།
2021-03-12
ལེ་ཚན་གཞན།
1,628 བལྟས་འདུག།
བོད་རྒྱལ་ལོ་ ༢༡༤༧ ལོའི་བོད་ཟླ་ ༡༠ པའི་ཚེས་ ༡༣ དང་། སྤྱི་ལོ་2020 སྤྱི་ཟླ་ 11 སྤྱི་ཚེས་ 27 ཉིན་འདི་ག་འཕགས་ཡུལ་ཁམས་སྒར་འབྲུག་མཐོ་སློབ་དྷརྨ་ཀཱ་རའི་གཙུག་ལག་སློབ་གཉེར་ཁང་གི་ལོ་མཇུག་གི་ཡིག་རྒྱུགས་ལ་ཁེལ་བས། འདི་ལོ་འཛིན་གྲྭ་འཚོགས་ཐུབ་པ་ཁག་གི་ཟུར་སྦྱོང་ཐུན་མོང་རིག་གནས་དང་། དབྱིན་ཡིག། གཞུང་ཆེན་ཁག་གི་རྩ་བ་བློ་འཛིན་བཅས་ཉེར་སྔོན་རྒྱུགས་སྤྲད་ཟིན་ཅིང་། དེ་རིང་དངོས་གཞིའི་གཞུང་ཆེན་སོ་སོའི་ལོ་མཇུག་གི་བྲིས་རྒྱུགས་ལེགས་པར་གྲུབ་ཏེ། སང་ཉིན་ནས་བཟུང་ཉིན་གསུམ་གྱི་རིང་དགེ་སློབ་རྣམ་པ་སློབ་གསེང་གནང་རྒྱུ་དང་། དེ་ནས་ཟླ་བ་གཅིག་གི་རིང་འཛིན་གྲྭ་གོང་འོག་མཉམ་སྤུངས་ཀྱིས་ཀུན་མཁྱེན་ཆེན་པོ་མི་ཕམ་པདྨ་དཀར་པོའི་ཚད་གཞུང་ཁག་དང་རིགས་ལམ་བཅས་པར་ཆེད་སྦྱོང་དང་། རྩོད་རྒྱུགས་ལེགས་པར་གྲུབ་མཐར་ལོ་འདིའི་སློབ་མཚམས་འཇོག་འཆར་ལགས་སོ། ། ལོ་འདི་ལ་ཏོག་དབྱིབས་ནད་ཡམས་ཀྱིས་རྐྱེན་པས། མཁན་སློབ་ཁག་གཅིག་དང་སློབ་གཉེར་བ་གང་འཚམས་ཞིག་འཛོམས་མ་ཐུབ་པར་ཕུད། དེ་མིན་འདིར་བཞུགས་དགེ་སློབ་རྣམ་པས་རྒྱ་གར་དབུས་དང་ས་གནས་མངའ་སྡེ་གཞུང་གིས་ནད་ཡམས་སྔོན་འགོག་ཆེད་དུ་ཁྱིམ་སྡོད་བཀའ་རྒྱ་དང་། རྒྱང་སྡོད་སོགས་ཀྱི་ལམ་སྟོན་གནང་བ་ལྟར། ཕྱི་ནང་རྒྱུ་འགྲུལ་མེད་པར་ལྷིང་འཇགས་ངང་རྩ་བའི་འཛིན་གྲྭ་བཅུ་གཉིས་ནང་ནས་འཛིན་གྲྭ་དང་པོ་བསྡུས་གྲྭ་དང་། གཉིས་པ་བློ་རྟགས། གསུམ་པ་ཚད་མ་ལོ་རིམ་དང་པོ། བཞི་པ་ཚད་མ་ལོ་རིམ་གཉིས་པ། ལྔ་པ་ཕར་ཕྱིན་ལོ་རིམ་དང་པོ། དྲུག་པ་ཕར་ཕྱིན་ལོ་རིམ་གཉིས་པ། བདུན་པ་ཕར་ཕྱིན་ལོ་རིམ་གསུམ་པ། བརྒྱད་པ་དབུ་མ་ལོ་རིམ་དང་པོ། བཅུ་གཅིག་པ་མཛོད་ལོ་རིམ་དང་པོ་བཅས་ཀྱི་རྩ་བའི་སློབ་ཚན་ཁག་དང་། ཡན་ལག་གི་སློབ་ཚན་ཆ་ཚང་སྔར་རྒྱུན་བཞིན་འཐུས་ཤོར་མེས་པར་འཚོགས་ཐུབ་པ་བྱུང་བ་ལགས་སོ། །